Mas mataas sang 119 porsyento ang kadamuon sang kaso sang leptospirosis sini nga tuig, kumparar sang tuig 2021.
Base sa record sang Department of Health okon DOH, humalin sang Enero 1 tubtub Disyembre 10, tuig 2022, may yara sang 4,157 ka mga indibidwal nga nagpositibo sa leptospirosis sa bilog nga Pilipinas.
Mas mataas ini sang 119 porsyento kumparar sa 1,900 ka mga indibidwal nga nagpositibo sang tuig 2021.
Na record sa National Capital Region okon NCR ang pinakamadamu nga kaso sang leptospirosis nga naglab-ot sa 832.
Nagapangaduha sa may pinakamataas nga kaso sang leptospirosis sa Pilipinas ang Western Visayas nga may 554 cases. Ikatatlo naman ang Cagayan Valley nga may 455 ka mga kaso.
Yari ang mga lugar nga nakaangkon sang pinakamadamu nga fatalities okon nagkalamatay bangud sang leptospirosis:
Metro Manila – 89 deaths
Western Visayas – 77 deaths
Central Luzon – 52 deaths
Ang Leptospirosis isa ka balatian nga tuga sang bacteria kag pareho nga nagaapekto sa tawo kag sapat.
Mahimo nga makuha sang tawo ang impeksyon, pinaagi sa ihi sang infected nga sapat okon sa baha nga kontaminado sang ihi sang sapat.
Bangud sini, ginpahanumdum sang DOH sa publiko nga likawan ang paghubog sa baha, ilabi na gid sa mga indibidwal nga may pilas okon open wound.*
