HIMAMAYLAN CITY – Dead-on-arrival ang isa ka negosyante matapos ginluthang samtang nagapanyaga sa isa ka kalan-an sa Brgy. 4, siudad sang Himamaylan takna la-1:45 sang hapon sang Martes, Pebrero 28.
Ginkilala ang biktima nga si Ronie Pabilona, 47-anyos nga negosyante nga nagabaligya sang softdrinks, kag residente sang Brgy. 2 sa nasambit nga siudad.
Base sa pahayag sang amay sang biktima, gindul-ong sang biktima ang iya bata sa buluthuan kag naghapit lamang agud manyaga sa kalan-an nga ginapanag-iyahan sang iloy.
Didto ginluthang ang biktima sang riding-in-tandem nga nagasakay sa puti nga motorsiklo kag wala nagasuksok sang helmet ukon bonnet.
Nakaangkon ang biktima sang igo sa nalikod nga bahin sang ulo, sa may tangkogo, nga naglapos pa sa iya nga mata, kag nagdanaw ang iya dugo sa lamesa kag salog.
Gindala pa ang biktima sa Gov. Valeriano M. Gatuslao Memorial Hospital apang gindeklarar ini nga dead-on-arrival.
Dugang pa sang amay kag mga nakakilala sa biktima, maayo ini nga tawo kag wala sang kontra.
Hinali naman nga nagpalagyo ang wala pa makilala nga mga suspek pagkatapos sang pagpangluthang.
Narekober sa crime scene ang basiyo sang kalibre .45 kag nagapadayon pa ang imbestigasyon sang kapulisan.
