Ginsilutan sang Korte Suprema ang lima ka abogado nga ginsunlog kag ginhimo katalawaan ang LGBTQIA+ community sa social media.
Base sa 26 ka pahina sang Per Curiam Decision, gin-“reprimand” sang Korte Suprema sanday Atty. Morgan Rosales Nicanor, Atty. Joseph Marion Peña Navarrete, Atty. Noel V. Antay, Jr., kag Atty. Israel P. Calderon.
Samtang, ginmulta naman sang P25,000 si Atty. Ernesto A. Tabujara III.
Suno sa SC, nagpalapas ang lima ka abogado sa Rule 7.03 sang Code of Professional Responsibility, nga nagadumili sa mga abogado nga maghimo sang mga butang nga makaguba sa ila legal profession.
Ini ang kasunod sang pag-post ni Atty. Antay sa iya Facebook account angut sa nadaug niya nga kaso kag napriso ang isa ka miembro sang LGBTQIA+ bangud sa kaso “large scale estafa.”
Ginsaysay ni Antay nga ginbuyayaw siya sang akusado bangud sa kaakig kag ginsaway naman ini sang judge, nga miembro man sang LGBTQIA+.
Didto na nagsugod magkomento ang iban pa nga mga nasambit nga abogado angut sa sekwalidad sang nasambit nga judge.
Ginpalayag naman sang Korte Suprema ang nasambit nga post amo ang puno sang gender bias, diskriminasyon, kag pag-insulto sa mga miembro sang LGBTQIA+.
Posible naman sila makasuhan sa idalom sang Safe Spaces Act.*
