RADIO REPORTER NGA SI RON ANDELECIO NABAWIAN GID SANG KABUHI MATAPOS ANG PILA KA ADLAW NGA PAGPAKIGBATO SA OSPITAL MATAPOS INI MA-AKSIDENTE SA ROXAS CITY
Ginbawian gid sang kabuhi ang Radio Reporter sang Radyo Todo Capiz nga si Katodo Ron Andelecio ukon mas kilala kay Katodo Ron Delicious matapos ini ma-aksidente sadtong Marso 7 kag pila man ka adlaw nga ginbulong sa ospital.
Matandaan nga ginamaneho ni Ron ang iya motorsiklo papauli na kuntani sa iya puluy-an sang ini ang nakabunggo sa isa ka tanker truck sadtong Domingo sang gab-e sa Crossing Jail, Barangay Lawaan, Roxas City.
Gindangat pa si Ron sa Intensive Care Unit (ICU) bangod nangin kritikal ang iya nga kondisyon.
Base man sa post sang istasyon nga ginpalangga kag gintiniran ni Ron, nakumpirmar nga ini ang nagtaliwan na kag tuman naman ang kasubo nga nabatyagan sang mga himata sini lakip na ang iya mga abyan kag mga kaupod sa trabaho.
Author’s note: Nagabuylog sang kasubo ang tanan nga industriya sang media sa kamatayon sang isa ka radio reporter nga nangin instrumento sa pagpalapnag sang mga maayong balita kag serbisyo publiko sa bilog nga Western Visayas.
