Suno kay Ka Andrea Guerrero, tagapamaba sang Armando Sumayang Jr. Command-New Peoples Army (ASJC-NPA) Southwest Guerilla Front sa isla sang Negros, sila ang responsable sa pagpatay sa 65-anyos nga mangunguma sa Sitio Tugas, Brgy. Pinggot, banwa sang Ilog sang Sabado sang gab-i, Enero 28.
Ginakabig sang NPA nga pagsilot ang pagtiro sa mangunguma nga ginkilala kay Silas Granada, alyas “Nacar”, 65-anyos, kag residente sang nasambit nga barangay, bangud suno kay Guerrero, regular ini nga intel sang Armed Forces of the Philippines (AFP) kag nagapangagaw ini sang duta sa Sitio Tugas kag Sitio Kanyabaka.
Gina-alegar ni Guerrero nga nawad-an sang uma, kadutaan, kag pangabuhian ang mga pumuluyo matapos ginpahog kag ginpahalin ni Granada.
Dugang pa ni Guerrero, una nga gin-agaw ang nasambit nga kadutaan sang amay ni Granada nga si “Miling” sang dekada 1970.
Ginpahayag pa ni Guerrero nga wala sang iban nga nahalaitan kag nag-agi sa husto nga proseso sang “Rebolusyonaryong Hustisya” ang ila pagsilot kay Granada bangud sa madamo nga reklamo sang mga pumuluyo.
“Ang ASJC-NPA nagatinguha nga madepensahan kag mapangapinan ang interes sang masang ginapigos kag ginahimuslan sang nagahari nga sahi kag nagapangagaw sang duta,” dugang pa ni Guerrero.
