700 ka mga pamilya apektado sang sunog sa Cebu

BACOLOD CITY– Apektado ang 700 ka mga pamilya sa isa ka sunog nga nagluntad sa Mandaue City, Cebu kagab-i, Martes, Nobyembre 22 takna las-11:45.

Suno kay Fire Chief Insp. Arnel Abella, nagdangat sa ika-apat nga alarma ang sunog sa Sitio Paradise, Barangay Looc apang gindeklarar nga fire out kaina las-2:00 sang kaagahon.

Kapin 250 ka mga panimalay ang naapektuhan sang sunog samtang nagdangat naman sa P1 milyon ang halit sang sunog.

Naka-agum naman sang pilas ang tatlo ka indibidwal kag duha ka nag-responder sa insidente.

Yara karon sa Mandaue City Central Elementary School ang mga survivors sang sunog.*