Isa sa mga rason sang pagmasakit sang mga kabataan, amo ang kakulang sa ehersisyo.
Suno sa World Health Organization (WHO), 81 porsyento sang mga kabataan sa bilog nga kalibutan, halos wala na naga exercise okon wala sang pisikal nga aktibidad.
Sa sulod sang isa ka adlaw, mas manubo pa sa isa ka oras ang ginahatag sang mga kabataan nga panahon, para sa ila physical activities kag kalabanan sa ila naga edad pa lamang sang 11 tubtub 17 anyos.
Base man sa record sang ahensya, indi physically active ang 85 porsyento sang mga kabataan nga mga babaye kag 77 porsyento naman ang mga lalaki.
Sang tuig 2019, nagpangaduha pa ang Pilipinas sa may pinakamadamu nga mga kabataan, nga indi physically active sa bilog nga kalibutan, sa diin isa sa mga gintumod nga rason amo ang paggamit sang gadgets, ilabi na gid ang cellphone.
Nagpanguna naman ang South Korea sa ranking sang tuig 2019.
Ang masami nga paggamit sang cellphone kag gadgets, nagaresulta sa kakulang sang ehersisyo okon physical activity sa mga kabataan. Ang kakulang sang ehersisyo nagaresulta naman sa pag develop sang mga problema sa ikaayong lawas katulad sang balatian sa korason, obesity, diabetes kag iban pa.
