Ginpahibalo sang Department of Health (DOH), nga mandatory sa gihapon ang pagsuksuk sang face mask sa sulod sang mga pampubliko nga mga salakyan kalakip na sa mga medical facilities.
Suno sa DOH, wala malakip ang public transport kag medical facilities sa mga lugar sa diin ginapahanugutan ang boluntaryo nga pagsuksuk sang face mask.
Ginklaro sang health department, nga obligado ang mga pumuluyo nga magsuksuk sang face mask kon nagasakay sa depasahero nga jeep, tren, bus kag iban pa subong man sa mga ospital, clinic kag iban pa nga kaangay sini nga pasilidad.
Sang tinalikdan nga Oktubre 25, ginpalayag ni Department of Tourism Secretary Christina Frasco, nga maga isyu sang executive order si Presidente Ferdinand Marcos Jr., agud himuon nga boluntaryo ang pagsuksuk sang face mask sa mga sirado nga mga establisemento.
Samtang, gina rekomendar sa gihapon sang mga eksperto ang pagsuksuk sang face mask para sa mga indibidwal nga wala mabakunahan, mga may comorbidities kag senior citizens.
Nagpaandam naman ang DOH nga mahimo magsaka sa 18,000 kada adlaw ang kaso sang COVID 19 sa Pilipinas sa bulan sang Nobyembre tubtub Disyembre kon untatan ang pagsuksuk sang face mask.
