Legal na sa bilog nga Mexico ang same-sex marriage bangud ginpahanugutan na ini sang Kongreso sang Tamaulipas sa Mexico.
Suno sa report sang Agence France-Presse, ginasiling nga ang Tamaulipas ang ulihi nga estado sa Mexico nga nagpahanugot sa layi agud mangin legal ang same sex marriage sa nasambit nga lugar.
Madumduman nga ang kabisera nga Mexico City ang pinakauna nga nagpahanugot sang same-sex unions sadtong tuig 2010.
Pagkatapos ang lima ka tuig, nagdeklarar ang ila Korte Suprema nga paglapas sa konstitusyon ang pagbalabag sa same-sex marriage.
Sini nga tuig 2022, pito ka estado sa Mexico ang nagpahanugot sa “marriage equality.”
Suno sa political scientist kag LGBTQ activist nga si Genaro Lozano, lima sa 32 nga estado sang Mexico nga nagdeklarar sang marriage equality pinaagi sa pagmando sang korte ukon gobernador ang may kaantangan nga “legislative harmonization.”
“But it is already a reality throughout Mexico. Thanks to all the activists and legislators who have supported it over the years,” suno kay Lozano.
via GMA
