Nagalalain ang iloy matapos nga negatibo ang resulta sang RT-PCR test sang iya siyam ka tuig nga bata nga babayi nga gincremate bangud nga ginpahayag nga suspected case sa COVID-19 matapos nga napatay bangud nga nabungguan sang salakyan sa siudad sang Iloilo.
Suno sa iloy ni Aleah Reynz Fruelda nga si Mrs. Emma Agodilos, apisar nga negatibo ang resulta sang test sang bata sini, wala na sila sang may mahimo pa bangud nga gincremate na si Aleah.
Madumduman nga ginapadangat sa Western Visayas Medical Center ang iya nga bata nga babayi nga ginbungguan sang multicab sadtong Setyembre 5 sa Barangay Democracia sa Jaro Iloilo City apang ginbawian ini sang kabuhi .
Nakibot naman ang iloy nga naghambal ang doctor nga nagakadapat nga i-cremate ang bata sini bangud makabig na ini nga suspek sa COVID-19 bangud may yara na ini sang exposure sa emergency room sang ospital.
Nagapati si Emma nga bangud sa aksidente rason nga nagtaliwan ang bata sini kag indi tungod sang COVID-19 , apang suno sa doctor isa ka pagsunod sa protocol sang DOH ang ila sini luyag nga ipatuman.
