Nagpaguwa sang pahayag ang University of the Philippines (UP) Broadcasting Association angut sa pinakauna nga Artificial Intelligence (AI) sportscasters sang Pilipinas.
Base sa official statement sang UP Broadcasting Association sang Domingo, Setyembre 24, 2023, posible ini magresulta sa malubha nga epekto sa buwas-damlag sang broadcasting kag iban pa nga luyag magsulod sa nasambit nga industriya.
Dugang pa sang asosasyon, indi dapat pagkalimtan nga instrumento lamang ang ini nga mga teknolohiya agud makabulig sa trabaho.
Nagapanindugan man ang UP Broadcasting Association nga dapat una nga mahatagan sang igtalupangod ang mga problema sang media workers kaangay sang contractualization, unfair labor practices, low compensation, kag lack of benefits.
“They should not, in any way, replace and displace the people who have spent years in the study and practice of broadcasting… Technologies that do not put humans in the center are no innovation at all. Thus, in the pursuit of advancement and excellence, the true essence of serving the people should not be left behind,” pahayag sang asosasyon.
Ginlunsar sang news network nga GMA ang AI sportscasters sang Sabado, Setyembre 23 para sa pagbukas sang Season 99 sang National Collegiate Athletic Association (NCAA).
