CALATRAVA, NEGROS OCCDIDENTAL – Patay ang isa ka babayi matapos ginluthang-patay ang iya kaugalingon las 7:25 kahapon sang aga, Setyembre 24 sa Barangay Lo-ok, banwa sang Calatrava, Negros Occidental.
Ginalantaw nga ‘depression’ ang motibo sa pagluthang sang biktima sa iya kaugalingon.
Base naman sa interview sang Radyo Bandera kay Police Captain Jesus Alba, gin-gamit sang biktima sa pagtiro sa iya kaugalingon ang pusil sang iya live-in partner nga isa ka pulis.
Gindugang pa ni Alba nga gina-alegar nagsunggod ang biktima matapos ini gin-akusar sa Barangay sang anak sang iya anay amo nga isa ka foreigner bangud sa pagpangastigo.
Suno pa kay Alba, nag-viral sa facebook ang live video sa pag-maltrato sang biktima sa iya amo.
Agud indi mamalisyahan ang natabo sa biktima, ginklaro ni Alba nga ma-request ang Calatrava Municipal Police Station kag gintugyan na sa SOCO ang imbistigasyon angot sa kaso.
Magluwas sini, ginkuhaan man sang paraffin test ang biktima kag iya live-in partner nga pulis samtang ginpaidalom naman sa laboratory examination ang armas sa NOCPPO.
Nahibaluan nga isa ka active on duty nga police officer sa Calatrava PNP ang live-in sang biktima.
Kapin duha na ka tuig nga mag live-in ang biktima kag ang pulis.
Disclaimer: Hungod nga gintago ang pangalan sang mga imbolbado nga persona bangud sa sensitibo nga balita.
