“I know your face.” ini ang ginhambal sang American national sa isa sa mga otoridad nga nagpugong sa iya matapos ini mag-eskandalo sa Terminal 3 sang Nino Aquino International Airport sang magsulod sa airport apisar nga wala sang plane ticket.
Sa video sang GMA News Feed, makita nga kalmado lamang nga ginabantayan sang mga security guard sa airport ang Amerikano apang matapos ang pila ka minutos, ginsumbag kag ginkuga na sini ang nasambit nga gwardya.
Gilayon naman nga nag-abot ang mga katapo sang PNP Aviation Security group agud punggan kag dakpon ang Amerikano.
Sang ginpamangkot ini sang mga otoridad kun ano ang iya nga problema, namahog pa ang Amerikano kag naghambal sang, “I know your face”.
Nagsabat naman ang pulis nga, “I know your face too.”
Apang, antes pa nga mag-eskandalo sa airport ang Amerikano, nagasakay ini anay sa taxi halin sa Makati kag nagpadul-ong sa aiport. Pag-abot sa airport, naglakat lamang ang Amerikano nga wala nagbayad sa taxi.
Rason nga ginlagas siya sang drayber kag nagpabulig sa mga security guard. Sang ginsita sang mga security guard ang Amerikano, nahibaluan nga wala ini sang plane ticket nga maipakita kag ginapilit sini nga magsulod sa airport.
Magapangatubang sa sampaw-sampaw nga reklamo ang Amerikano kag nakig-angut na karon ang mga otoridad sa US Embassy.*
