Nadakpan sa ginpatigayon nga entrapment operation sang National Bureau of Investigation (NBI) – Bacolod City ang anay tagpamuno sang General Services Office (GSO) kag retirado nga capitol employee nga si Lucille Pines angut sa reklamo nga estafa.
Ini ang ginkumpirmar sa media ni NBI-Bacolod Head Atty. Renoir Baldovino nga may misrepresentation sa bahin ni Pines kun sa diin gin-usar sini ang pangalan sang Sheen Consumers Cooperative agud makapangita sang investors ukon partner nga maga-invest para sa iya transaksyon sa baylo sang 3 porsyento tubtob 8 porsyento nga interest.
Sandig sa affidavit nga ginsumiter sang complainant nga si Mary Jean Mamon, ginpa guwa ni Pines nga nagdaug sa Public Bidding ang Sheen Cooperative nga amo ang maga suplay sang mga office supplies sa probinsya sang Negros Occidental.
Apang sang nag invest na ang complainant kay Pines, ginapahibalo naman sya sang suspek nga nagsaylo na ini sa Homemakers Enterprises Association of Negros Occidental (HEANO) nga may opisina sa Barangay Bata, Bacolod City.
Magluwas kay Mamon, nag reklamo man ang isa ka Susano Lumayno nga nag text sa iya si Pines nga nagasiling nga nag retired na ini sa provincial government kag may Purchase Order ini para sa Deped San Carlos City.
Suno sa alegasyon ni Lumayno, ginapilit siya ni Pines nga mag-invest kay kanugon sang oportunidad kun indi ini mag bubo sang kapital.
Apang nagpaguwa sang certification ang DepEd, Division of San Carlos sadtong Abril 11, 2023 kag ginpahayag nga wala sang anuman nga transaksyon ang School Division sang San Carlos City sa Homemakers Enterprising Association of Negros Occidental kag bisan kay Lucille Pines.
Bangud sang mga lehitimo nga reklamo ginkasa sang NBI ang entrapment operation batok kay Pines sang tinalikdan nga Abril 17 sa opisina sang Homemakers sa Barangay Bata, siyudad sang Bacolod.
Pinaagi sa isa ka mga intelligence officer kag operative sang NBI nga nagpakuno-kuno nga mga investors natigayon nga madakpan si Pines matapos sini ginbaton ang P150,000 nga boodle money.
Matapos ang entrapment operation gindala sa opisina sang NBI-Bacolod si Pines.
Samtang ginpasaka naman sang NBI-Bacolod ang reklamo nga paglapas sang Article 315 sang Revised Penal Code as amended by Republic Act 9287 nga swindling ukon estafa batuk kay Pines.
Ginpahayag man ni Baldovino sa interview sang media nga magluwas sa duha ka bag-o ka complainants, may nauna pa nga 12 ka mga persona nga nagreklamo man sa NBI matapos gina-alegar nga nag invest man sila kay Pines sang kabilogan nga P30 milyones.
Samtang sa interview sang Radyo Bandera Bacolod kay Provincial Legal Officer (PLO) Atty. Alberto Nellas Jr., naka retite si Pines bilang Capitol Employee bangud wala man sang kaso nga administratibo nga ginpasaka sa iya antis pa man siya nag retiro. Gin-release si Pines kag ginhatagan ini sang 10 ka adlaw agud maka-submit sang iya counter-affidavit.*
