Ginpalayag ni Health Undersecretary Maria Rosario Vergeire nga wala ginarekomendar sang Department of Health (DOH) sa publiko ang nabakunahan sang COVID-19 vaccines nga magpaidalom sa antibody testing para mabal-an kung protektado batok sa virus.
Ini ang may kaangtanan sa hearing sa Kongreso angot sa antibody testing nga ginhimo sang mga bakunado nga luyag mahibaluan kung may antibodies na ang ila lawas matapos nga magbaton sang bakuna.
Nagatuga ini sang manubo nga kumpyansa sa pagpabakuna base sa ila mga resulta.
Ginsiling pa sang opisyal nga ang negatibo nga resulta sang antibody test ang wala nagakahulugan nga indi epektibo ang COVID-19 vaccine.
Ginsiguro niya nga tanan sang bakuna nga yara sa pungsod ang epektibo bangod nag-agi ini sa hugot nga regulasyon antes nahatagan sang ‘emergency use authorization (EUA)’.
Ginsiling naman ni UP-National Institutes of Health (UP-NIH) Dr. Regina Berba, wala ginarekomendar sang mga global experts ang neutralizing antibody testing bangod wala ini nagakahulugan nga indi protektado ang isa ka tawo nga may zero ukon negative antibodies apisar nga nabakunahan na.
Suno kay DOST-Phil. Council for Health, Research and Development Executive Director Dr. Jaime Montoya, masami nga cellular part na ang nagagana sa lawas rason nga manubo ang level sang antibodies nga protektado sa giyapon sang isa ka persona batok sa COVID-19.
