BACOLOD CITY – Nagdangop sa Radyo Bandera si Bryan Mor kaupod ang iya asawa nga si Jenelyn Semillano agud makapanawagan sang bulig para may inugplete papauli sa Tibiao, Antique matapos magmasakit si Bryan kag wala ginbuligan sang contractor nga nag-recruit sa ila nga magtrabaho bilang karga-tapas sa probinsya sang Negros Occidental.
Nag-abot sanday Bryan kag iya asawa sa banwa sang Murcia sadtong Oktubre 5, 2022 agud magtrabaho bilang mga karga-tapas.
Apang isa ka bulan pa lamang sila nga nagatrabaho, nagmasakit si Bryan, nagbanog ang iya mga tuhod, kag wala makatindog sa sulod sang duha ka semana.
Sang nagpangayo ang duha sang bulig sa contractor agud makapauli, gin-akigan pa sila bangud nanugid sila sang ila gindangatan sa ila himata sa Antique.
Bangud sang ila pagpanawagan, pila ka mga Solid Radyo Bandera Supporters (SORABS) ang nagpa-ambit sang ila bulig.
Nalakip sa mga naghatag sang bulig sanday Engr. June M. Ramos nga naghatag sang P1,000, si Gilbert Mata naghatag sang P500, kag naghatag man ang SORABS Taculing Officers sang P200 pinaagi kay Chimmy Aragon.
Nagapasalamat naman ang duha sa mga nagbulig sa ila bangud makapauli na sila sa ila nga lugar.
