NEGROS OCCIDENTAL – Dakup ang apat ka mga persona matapos maaktuhan nga gin-alegar nagapangawat sang krudo halin sa fuel reserve tank sang cell site sa Purok 4, Barangay Poblacion sa banwa sang Cauayan, Negros Occidental, takna las 12:40 kaina sang kaagahon, Lunes, Setyembre 5, 2022.
Ginkilala ang mga gindakup nga sanday Rommel Negre, 38-anyos, Emilio Lumantad, 41-anyos, Rogelio Pendon, 39-anyos, mga residente sang Barangay Banago, Bacolod, kag Rosine Marie Tentiya, 30-anyos, nga taga Barangay 1 sa Bacolod.
Nakabaton sang impormasyon ang kapulisan halin sa concerned citizen nga may yara sang makaduluda nga pula nga Mitsubishi Strada nga naka-park sa atubangan sang smart cell site.
Sang ginkadtuan sang pulis agud i-verify, ila naaktuhan ang isa sa mga suspek nga ginkilala kay Lumantad, nga ginapasuyopan ang fuel reserve tank sang cell site samtang ang iya mga kaupdanan ang sakay sa Strada nga may plate number FAH 2078.
Nakuha sa mga suspek ang bolt cutter, hack saw, 15 ka containers, isa ka container nga puno sang krudo kag duha ka homemade shotgun nga may 7 ka live ammunition.
Yara karon nakahunong sa Cauayan Police Station ang mga suspek.*
