BACOLOD CITY– Ginbawian na sang kabuhi ang isa ka babaye nga call center agent sang isa ka Business Processing Outsourcing (BPO) nga nahamtang sa dalan Araneta, Barangay Singcang-Airport sa siudad sang Bacolod.
Ginkilala ang biktima kay Erlynor Colango, 28-anyos, residente sang Barangay Cabatangan, Talisay City, Negros Occidental samtang ang driver sang motorsiklo ang ginkilala kay Rex Evrile Pedrajas, residente sang Purok Villa, Barangay Tangub, siudad sang Bacolod.
Sa interview sang Radyo Bandera kay Police Captain Glenn Montaño, hepe sang Bacolod City Police Station 8, iya ginkumpirmar nga ginbawian na sang kabuhi sa Bacolod General Hospital ang biktima matapos makaangkon sang pilas sa ulo tuga sang pagkalampos sa semento.
Suno kay Captain Montaño, nagluntad ang insidente takna las-9:50 kagab-i, sang nagtabok ang biktima sa pedestrian lane pakadto sa iya ulobrahan sa nasambit nga lugar.
Sa imbestigasyon sang PS8, halin sa Barangay Tangub pakadto sa Norte nga direksyon ang motorsiklo sang magluntad ang aksidente.
Depensa sang driver wala niya natalupangdan ang biktima rason nga nabungguan ini, ulihi na niya nahibaluan sang nagasilinggitan na ang mga tawo sa lugar.
Ginkumpirmar man ni Montaño nga nagpadulong sa ila talatapan ang himata sang biktima kaupod ang traffic investigator kag ang suspek kun ano ang kaso ang posible i-apila kag kun may settlement sang duha ka partido.
Ginpahayag man sang hepe ang kaso nga reckless imprudence resulting to homicide ang pagaatubangon sang driver sang motorsiklo.*
