Posible nga pahanugutan na sang gobyerno ang backriding sa mga motorsiklo sat ion nga mangin pinal na ang safety protocols para nga malikawan ang paglapta sang COVID-19 sa nasambit nga transportasyon.
Suno kay Presidential Spokesman Harry Roque, ang DOTr kaupod ang DOST, DOH, MMDA, DTI, kag Bureau of Philippine Standard ang ginmanduan na nga magpulong kag hibaluon ang pinakaluwas kag pinakaepektibo nga pamaagi agud nga mabuhinan ang transmission sa backriding sa mga motorsiklo.
Apang suno sa iya, kinahanglan sang National Task Force nga magpaggwa sang guidelines kag “in principle” nga ginapahanugutan na ang backriding kag kinahanglan na lamang nga maghulat.
“So malapit na po ang backriding. Pero. Kinakailangan na ang NTF po ang mag-issue ng mga guidelines,” pahayag ni Roque.
Ginpahayag pa ni Roque nga ang nasambit nga practice ang “allowed in principle” na sa tion aprubahan ang requirement sang technical Working Group.
“Antay antay na lang po muna at baka pwede nang mapayagan ang backriding,” suno pa kay Roque.
Gindugang pa ni Roque nga ginatun-an na sang DOH ang hagna sang ride-hailing firm Angkas sang pagsuksok sang “special suit” ukon divider sa tunga sang rider kag pasahero agud nga masiguro ang distansya sa mga motorcycle taxis.
Una diri, ginpanindugan sang gobyerno ang pagdumili sa backriding sa motorsiklo bilang quarantine measures agud nga malikawan ang paglapta sang COVID-19.