Ginbawian sang kabuhi ang bana samtang pilason naman ang asawa sini matapos ginluthang sang duha ka mga armado nga lalaki nga kawatan sa Concepcion Public Market, Zone 4, Brgy. Concepcion, siudad sang Talisay, takna 3:15 sang kaagahon, Lunes, Oktubre 2, 2023.
Ginkilala ang napatay nga bana kay Ildefonso “Junjun” Medalla y Abraso, yara sa ligal nga pang-edaron samtang ginkilala naman ang asawa sini nga pilason kay Denalyn Medalla y Pandacan, yara sa ligal nga pang-edaron, lunsay mga residente sang Hda. Gloria, Brgy. Concepcion, Talisay City.
Base sa pagpangusisa sang Radyo Bandera Bacolod, ginransak sang duha ka kawatan ang May Store kag nakuha sang mga ini ang P50,000 nga cash kag nagkalain-lain nga mga baligya kalakip na ang mga sigarilyo.
Sang magabukas na kuntani ang mag-asawa sang ila gina-obrahan nga karinderya nga Bebing’s Eatery nga tupad lamang sang May Store, naabtan sila sang mga kawatan kag hinali na lamang sila ginpangluthang.
Ginpadalagan pa sang bana ang iya asawa agud makaluwas ini rason nga nabilin ini upod ang mga kawatan kag didto na siya ginpaarakan sang luthang.
Nakaangkon ang bana sang apat ka igo sang bala sa iya dughan, tiyan kag natuo nga abaga nga gintunaan sang iya gilayon nga kamatayon.
Apang, nakaangkon naman sang igo sang bala sa tiyan ang asawa rason nga gindala ini sa Corazon Locsin Montelibano Memorial Regional Hospital agud mahatagan sang medikal nga atensyon.
Narekober sa ginlutaran sang kremin ang lima ka basiyo sang bala sang wala pa mahibaluan nga kalibre sang armas-luthang.
Padayon naman ang imbestigasyon sang mga kapulisan agud makilal-an kag madakpan ang mga suspek nga nagpalagyo sakay sang motorsiklo matapos ang kremin.*
