Ginhaya na ang bangkay ni Ildefonso “Junjun” Medalla y Abraso sa ila balay nga nahamtang sa Shalom Heights, Barangay Concepcion, siudad sang Talisay subong nga Biyernes, Oktubre 6, 2023.
Madumduman nga ginbawian sang kabuhi si Medalla matapos ini ginluthang-patay sang duha ka armado nga mga lalaki nga nangawat sa balaligyaan nga tupad lamang sang ila gina-obrahan nga kalan-an sa Concepcion Public Market, Zone 4, Brgy. Concepcion, siudad sang Talisay, takna 3:15 sang kaagahon, Lunes, Oktubre 2, 2023.
Samtang, pilason kag nakaangkon sang igo sang bala sa iya nga tiyan ang asawa sini nga si Denalyn Medalla y Pandacan matapos nga ginluthang man sang mga suspetsado sang makapalagyo ini sang nagluntad ang kremin.
Narekober sa ginlutaran sang kremin ang lima ka basiyo sang bala sang wala pa mahibaluan nga kalibre sang armas-luthang.
Padayon naman ang imbestigasyon sang mga kapulisan agud makilal-an kag madakpan ang mga suspek nga nagpalagyo sakay sang motorsiklo matapos ang kremin.*
