Nasapwan nga naga-utaw-utaw ang bangkay sang 73-anyos nga iloy sa suba nga sakop sang siudad sang Bago, takna las 8:30 sang aga, Miyerkules, Setyembre 20, 2023.
Ginkilala ang biktima kay Nilda Modesto y Nuñala, isa na ka balo, kag residente sang Barangay 18 sa siudad sang Bacolod.
Nahibaluan nga nakit-an na lamang ni Rolan Ebro ang biktima nga nagalutaw na sa Bago City River kag gilayon niya ini gindala pahigad sa Sitio Cavan, Brgy. Tapong, banwa sang Pulupandan.
Suno sa iya nga bata nga si Ma. Elena, nadula ang ila iloy sang Setyembre 19, kag ila nga nahibaluan nga makadto ini kuntani sa ila nga paryente sa Brgy. Tibsok, San Enrique.
Apang bangud nga may ara sang Alzheimer’s disease si Nilda, posible nga wala ini nakatultol kag nana-og sa taytay sang Bago kag naglakat-lakat kabangdanan sang iya pagkalumos. *
