Nasapwan nga wala na sang kabuhi ang isa ka security guard sa Smart Cell Site, Don Jaime Village, Brgy. San Jose, Sipalay City sadtong Setyembre 26, las 7:30 sang aga.
Ang biktima ang ginkilala kay Richard Gonzaga y Laparan, 39 anyos, may asawa, security guard sang Smart Cell Site kag residente sang Sitio Manlu-a, Brgy. San Jose sa nasambit nga syudad.
Base sa inisyal nga imbestigasyon, las 10:00 sa gab-e, Setyembre 25 samtang nagaisahanon ang biktima sa iya nga duty, pila ka residente ang nakabati sang lupok sang wala mahibaluan nga armas-luthang.
Pagka-aga, Setyembre 26, padulong na kuntani ang iya sini nga bayaw agud magbulos sa iya nga duty, sang siya ang nakita sa guard house nga nagahiligdaon kag may igo sang armas-luthang ang iya sini nga ulo kag abaga.
Ang bangkay sang biktima ang gindala sa Sipalay Health Office para sa Post Mortem Examination.
Sa karon, padayon pa ang imbestigasyon sang mga kapulisan sa nasambit nga insidente.
