HIMAMAYLAN CITY – Duguon kag posible utdon ang kamot sang isa ka lalaki matapos ginlabo-labo sang espading sa Sitio Calansi, Barangay Mambagaton, siudad sang Himamaylan.
Suno kay Police Lieutenant Colonel Reynante Jomocan, hepe sang Himamaylan City Police Station, nagaguwa sa ila imbestigasyon nga kutso-kutso kag pag-inaway sang mga asawa sang biktima kag suspetsado ang ginhalinan sang pagpanglabo.
Base sa report sang kapulisan, takna las-6:30 sang gab-i sang Lunes, Hulyo 17, 2023, nagasakay sa traysikol papauli si Joemari Mercado, 46-anyos, kag ang iya asawa nga si Lucy; lunsay mga residente sang nasambit nga lugar.
Apang nakit-an nila nga nagatindog sa tunga sang dalan si Christian Mendoza, 23-anyos nga residente man sang nasambit nga lugar.
Nagpundo kag nanaug sa traysikol si Mercado agud palapitan si Mendoza apang nagresulta ini sa pagbinaisay.
Didto na nagkuha si Mendoza sang espading kag ginlabo si Mercado sang makapila ka bes.
May mga igo ang biktima sa ulo, liog, kag nawala nga kamot, samtang ang suspetsado amo ang gilayon nga nagpalagyo.
Ginsaylo naman ang biktima sa ospital sa Bacolod kun diin ginalantaw nga utdon ang iya kamot bangud malubha ang igo sini sa ugat.
