Patay na sang masapwan ang isa ka 72-anyos nga lalaki sa Barangay Old Poblacion, siudad sang Escalante, Negros Occidental takna las 8:00 sang gab-i, Domingo, Marso 12, 2023.
Hungod nga wala ginpangalanan ang biktima bangud ini ang isa ka sensitibo nga balita.
Suno sa interview sang Radyo Bandera kay Police Major John Ganzon, hepe sang Escalante Police, nanawag ang bata sang biktima takna las 8:00 sang gab-i nga nasapwan nila ang ila amay nga nagabitay sa ila kamalig sa likod nga bahin sang ila balay gamit ang isa ka kalat.
Ginhingagaw pa ini dala sang iya mga himata sa Vicente Gustilo District Hospital sa siudad sang Escalante apang gindeklarar na ini nga dead on arrival.
Suno sa interview sang imbestigador sa pamilya sang biktima, problema sa pamilya kag depresyon ang ginatan-aw nga rason sa paghikog sang ila amay.*
