Ginhingyo sang Department of Justice (DOJ) sanday Suspended Bureau of Corrections (BuCor) Director General Gerald Q. Bantag kag Bucor’s Deputy Security Officer Ricardo S. Zulueta nga mag surrender, matapos nga ginpasaka na ang kaso nga murder, Lunes nga adlaw, Nobyembre 7.
Si Bantag kag Zulueta amo ang ginatudlo bilang utok okon nagsugo sa pagpatay sa broadcaster nga si Percy Lapid okon Percival Mabasa subong man sa New Bilibid Prison (NBP) inmate nga si Cristito Villamor Palana, nga gina alegar “middleman” sa pagpatay sa broadcaster.
Ginpaathag ni DOJ secretary Crispin Remulla nga kinahanglan atubangon nanday Bantag kag Zulueta ang akusasyon bangud suportahan man sang korte ang duha ka mga opisyal kon mapamatud-an nga “indi guilty” sa mga akusasyon.
Ginkumpirmar sang PNP nga nagpalagyo na si Zulueta samtang ginahibalo naman sang mga otoridad ang lugar nga ginatiniran ni Bantag.
Nag-apela na si Department of Interior and Local Government okon DILG secretary Benjamin Abalos sa publiko, nga maghatag sang impormasyon sa gobyerno angut sa ginahamtangan ni Zulueta.
Magluwas kay Bantag kag Zulueta kalakip man sa ginpasakaan sang kaso nga “principals by indispensable cooperation” angut sa kamatayon sang broadcaster nga si Lapid kag priso nga si Palana amo ang mga priso man nga sanday Denver Batungbakal Mayores, Alvin Cornista Labra, Aldrin Micosa Galicia kag Alfie Penaredonda.
Sa pagpatay kay Palana, ginpasakaan man sang kaso nga “principals by direct participation” ang mga priso pa gid nga sanday Christian Dizon Ramac, Ricky Lamigo Salgado, Ronnie Pabustan Dela Cruz kag Joel Alog Reyes.
