Ginkumpirmar ni PLT Joeven Mogato ang team leader sang CDEU nga isa ka Barangay Kagawad ang nadakpan nga babaye sa Brgy. Alijis kaina sang kaagahon sa ginpatigayon nga buy-bust operation sa Alijis-Taculing Road, Brgy. Alijis, Bacolod.
Ang babaye ginkilala kay Abby Araneta y Flores taga ECC Villas Subd. Brgy. Alijis kag ginakabig nga High Value Individual (HVI).
Magluwas kay Abby, nadakpan man upod sa iya ang iya abyan nga si Freely Boy Aldas y Sernal residente sang Purok Cabugwason, Brgy. Mansilingan, Bacolod City.
Base sa interview sang Radyo Bandera kay Mogato nga madugay na nila nga gina-monitor ang Barangay Kagawad nga nagabaligya sang shabu sa mga kabataan antes pa ang Masskara kag madugay na nga naga-engaged sa iligal nga droga.
Dugang pa ni Mogato nga may nagadul-ong kay Araneta sang shabu nga ginapatihan halin sa guwa sang probinsya kag kung kis-a naga meet-up ini gamit ang nagkalain-lain nga salakyan.
Ang nakumpiskar nga P1.3 million nga shabu ang item gid ni Araneta kag posible iga-distribute naman bangud may mga narekober nga pinutos sang shabu ang mga otoridad.
Posible nga may ‘connection’ si Araneta sa pila man ka drug personality sa ciudad.
Sa karon, padayon ang follow-up operation sang mga otoridad kung sin-o pagid ang mga upod ni Araneta.
Nahibaluan nga si Araneta ang target sang buy-bust kaina sang kaagahon.
Si Araneta ang anay SK Kagawad antes ini nangin Barangay Kagawad sang Alijis.
