BACOLOD CITY – Gin-alegar agaway sa pasahero ang rason kung ngaa nag-agaway man sang armas luthang ang duha ka mga barkers malapit sa isa ka pasalubong center sa Purok Katilingban, Barangay Alijis sa syudad sang Bacolod, pasado las 2:00 sini nga hapon, Miyerkules, Agosto 17, 2022.
Nagresulta ini sa pagkaluthang ni Radney Arevalo, 59-anyos, nga naigo ang nawala nga kamot sang bala sang gin-alegar improvised firearm.
Suno sa panaysayon sang mga residente sa kapulisan nga nagresponde, dugay na nga wala naga-intyendihanay si Arevalo kag ang suspek nga ginkilala kay Rexan Yap, 49-anyos.
Pareho nga barker sanday Arevalo kag Yap kag nagapasaka sang pasahero sa atubangan sang BongBong’s Pasalubong.
Sandig sa imbestigasyon sang Bacolod Police Station 8, ginhambalan ni Arevalo si Yap nga kuhaon lang ang iya pwesto bilang barker.
Apang nagpauli si Yap kag ginsunod man ni Arevalo.
Sang nakita ni Arevalo nga nag-gabot na sang pusil si Yap, iya ini gin-agaw apang natiruhan ang iya kamot.
Nakapalagyo si Yap apang ginhingyo na sang kapulisan ang iya pamilya nga isungka na siya.
Narekober naman ang armas luthang nga gingamit sa insidente.*
