AGUSAN DEL NORTE– Patay na sang nasapwan sa suba sang Agusan del Norte ang duha ka tuig nga bata.
Ginkilala ang bata kay Jake Kobe, pinakamanghod nga anak nanday Rolito kag Emma Bito.
Sang adlaw nga nadula si Jake, nagabaligya sang pagkaon sanday Rolito kag Emma sa bulangan.
Kaupod ni Jake sa sulod sang balay ang iya magulang nga babayi.
Kampante naman ang ginikanan ni Jake nga nagahampang lamang ini sa atubangan sang balay.
Pagkatapos sang pila ka mga oras, nakabaton sang mensahe si Emma halin sa mga utod ni Jake nga nadula ang ila manghod.
Gilayon nagpauli ang mag-asawa kag ginpangita ang ila anak.
Nagpabulig ang pamilya sa mga kapulisan agud pangitaon si Jake.
Nakita sa CCTV footage nga may isa ka babayi nga may bitbit sang bata apang indi nila matumod kun si Jake ini.
Nakabaton man si Emma sang mensahe nga may isa ka babayi nga pasahero sa bus nga may upod nga bata nga nagahibi kag ginapangita ang iloy.
Matapos sang pila ka adlaw, nakita na lamang si Jake nga nagautaw-utaw sa suba.
Nagapati naman si Rolito nga wala nalunod ang iya anak bangud sa hitsura sini.*
