BACOLOD CITY– Plano nga pagabutangan sang Benitez Administration ang 70 ka pampubliko nga mga buluthuan sa Bacolod sang libre nga WiFi agud mangin mahapos kag madasig ang pag-research sang mga estudyante.
Sa interview sang Radyo Bandera kay Lila Vaflor-Arro, Administrative Officer sang Department of Education (Dep-Ed) Bacolod iya ginpahayag kahapon, Oktubre 11 ang mga kinahanglan sang mga bulutuhuan kag estudyante.
Suno pa kay Arro, luyag ni Mayor Albee Benitez nga mabutangan sang WiFi kag audio systems ang tanan nga pampubliko nga mga buluthuan, desktop computers para sa online learning centers kag mobile learning hub.
Dugang pa ni Mayor Benitez nga indi lang sa mga buluthuan pagadal-on ang maayo nga edukasyon kundi pati na sa mga pumuluyo sa tagsa ka mga barangay nga wala makatapos sang ila pag-eskwela pina-agi sa Alternative Learning System (ALS).
Ang plano sa pag-upgrade sa sistema sang edukasyon sa siudad ang konektado man sa luyag ni Mayor Benitez nga mangin Global City ang Bacolod nga may mabakod nga digital infrastructure.
Magluwas sa proyekto kag programa sa idalom sang Benitez Administration, ang DepEd Bacolod ang maga-repair man sang pila ka mga buluthuan kag dugang nga mga pulungku-an bangud sang pagdamo sang mga estudyante nga nag-saylo sa pampubliko nga buluthuan.*
