(Paandam: graphic content)
BAGO CITY – Patay kag wasak ang ulo sang isa ka lalaki matapos mabungguan kag malapakan samtang nagabisikleta sa highway sa bahin sang Barangay Taloc sa siudad sang Bago sang Huwebes sang kaagahaon, Hulyo 6, 2023.
Suno kay Police Senior Master Seargent (PSMS) Jeffrey Montinola, traffic investigator sang Bago City Police Station, indi makilala ang itsura sang biktima bangud sa halit nga tuga sang paglapak sa iya ulo sang pickup.
Makita sa CCTV footage nga magatabok kuntani ang biktima halin sa tuo nga bahin sang dalan padulong sa wala sang mabungguan ini sang motorsiklo nga Yamaha R15 nga ginamaneho ni Ariel Remegio Jr., 30-anyos nga residente man sang nasambit nga siudad.
Pagkatapos sang pila ka segundos, nalapakan pa ang natumba nga biktima sang pickup nga nagresulta sa pagkadunot sang ulo kag kamatayon sini.
Apang wala nagdulog ang pickup kag wala man maklarohan ang plate number sini.
Ginapanawagan man sang kapulisan, ilabi na sa mga residente sang Bago, nga nadulaan sang himata, nga mahimo makigpag-angut sa ila agud makilala ang biktima nga ginabulubanta naga-edad sang 30 tubtob 40-anyos kag may kataason nga ginabulubanta 5’6″ ukon 5’7″.
Nagasuksok man ang biktima sang kalo, t-shirt nga nagaduag sang itom, kag khaki nga shorts sang magluntad ang aksidente.
Samtang pilason man ang ang drayber sang motorsiklo kag ginsaylo na ini sa ospital sa siudad sang Bacolod.
