CADIZ CITY, NEGROS OCCIDENTAL – Gutom kag nagapalanugnaw sang makit-an nga nagapa-utaw utaw sa lawod sa tunga sang Northern Negros kag isla sang Bantayan ang boatman nga duha na ka adlaw nga ginapangita.
Masuwerte nga nakit-an sang tatlo ka mga mananagat ang boatman nga ginkilala kay Jolly Beating Jr., 35-anyos nga residente sang Barangay Cadiz Viejo sa siudad sang Cadiz, nga nagapanguyapot sa pumpboat sini nga nagkapan kag naga-utaw utaw.
Nahibaluan nga sang Martes, Hulyo 25, 2023, gikan si Jolly sa Lakawon Island kag nagdul-ong ini sang construction materials sa Pandanan, Brgy. Himoga-an Baybay, siudad sang Sagay.
Takna las kwatro sang hapon, pabalik na ini kuntani sa Lakawon apang sang malapit na sa isla, na-aberya ini bangud sa mabaskog nga balod kag badlos nga hangin tuga sang bagyong Egay.
Nakakas ang katig sang pumpboat, rason kun ngaa wala ini makapauli tubtob naabtan sang kagab-ihon nga ginkabalaka naman sang iya utod.
Sang gintawgan si Jolly sang iya magulang nga si Jonelyn, didto nahibaluan ang sitwasyon sang biktima.
Gilayon nga nangayo sang bulig sa Philippine Coast Guard kag sa iban pa nila nga mga kilala si Jonelyn.
Samtang ginahiwat ang search and rescue, ginapasiga ni Jolly ang iya dala nga gamay nga flashlight kag cellphone, apang wala ini makita bangud sa kalain sang tiempo.
Dugang pa sa kabudlayan ni Jolly, nabugto ang angkla sang pumpboat nga nagresulta sa pagka-anod sini padulong sa isla sang Bantayan kag indi na ma-contact ang cellphone sini.
Pagkalipas sang duha ka adlaw, nakit-an ang biktima sang mga mananagat kag gindala nila ini sa isla nga sakop sang Bantayan, Cebu.
Pasado las syete sang aga sini nga Huwebes, Hulyo 27, ginpahibalo ni Jolly ang maayo nga balita sa iya pamilya pinaagi sa cellphone nga iya ginputos sang plastic sa duha ka adlaw sini nga pag-utaw utaw sa dagat.
“Neng, ako ni neng… Namaypay ko sang mananagat nga naglabay sa akon,” ini ang mga tinaga ni Jolly nga nagpatulo sang mga luha ni Jonelyn bangud sa kalipay.
Suno kay Jonelyn, sa bilog nga tion nga wala makapauli kag nagakagutman ang iya manghod, indi man ini makakaon kag ginaluad sini pati ang tubig.
