CADIZ CITY, NEGROS OCCIDENTAL – Isa ka vintage bomb nga nagabug-at sang malapit 500 ka kilo ang natukiban sa quarry site sa Sitio Lambunao, Barangay Magsaysay, siudad sang Cadiz.
Base sa report sang Cadiz City Police Station, nagakutkot ang backhoe operator nga si Rolly Pelongco, 46-anyos, sang matukiban sini ang vintage bomb takna las-11:30 sang gab-i sang Lunes, Hulyo 24, 2023.
Dugang sang uploader nga si Ferrer, nagresponde na ang mga otoridad kag suno sa bomb experts, 1,000-pound ini nga bomba.
Ginbilin anay ini sa lugar bangud delikado ibyahe kag indi pwede mainitan ang nasambit nga sahi sang bomba.
Samtang ginadumilian naman ang mga pumuluyo nga magpalapit sa lugar nga nahamtangan sang vintage bomb.
“Ari lang di dyapon pero gin-cordon to sang backhoe, ginbutangan ang palibot duta nga indi gid sya matandog kag ginbawalan na to ang area,” pahayag sang uploader.
Ang natukiban nga bomba ang kaangay sang 1,000-lb. bombs nga gingamit sa World War II para magpalupok sang mga taytay, dams, kag iban pa nga dalagku nga targets.
