Nagsumiter sang reklamo ang isa ka businesswoman sa National Bureau of Investigation matapos ini madulaan sang P1 milyones nga balor sang kwarta sa iya nga bank account.
Sandig sa report, nakabaton sang madamo nga mensahe ang biktima angut sa One Time Password (OTP) sadtong Oktubre 26 kag 27, apang ginpawalaan niya lang ini bangud wala siya nagagamit sang online banking sa iya mga transaksyon.
Bangud diri, gintawgan sang biktima ang bangko matapos makabaton sang mensahe nga nagapaandam angut sa isa ka suspetsuso nga transaksyon.
Sang nagkadto ini sa bangko, didto niya nahibaluan nga masobra isa ka milyones pesos ang nadula sa iya nga account.
Gilayon naman nga nakig-angut ang (NBI) sa bangko sa ginsumiter nga reklamo sang biktima kag ginpahgayag nila nga indi na mabalik ang kwarta nga nadula bangud sa OTP kag ang lack of breach nga nakita sa ila nga system.
Bangud diri, mahugot nga ginpahinumdom sang bangko sa publiko nga indi pag-ihatag ang ila mga impormasyon bisan sa kun sin-o, ilabi na ang ila nga bank accounts.*
via GMA