Nangin emosyonal ang utod matapos ginkumpirmar ang bangkay sang 3rd year chemical engineering student sa Adamson University nga ginapatihan biktima sang hazing.
Natultulan ang bangkay sang biktima nga si John Matthew Salilig sa isa ka bakante nga lote sa Cavite sang Martes, Pebrero 28, matapos gintudlo sang isa sa mga suspetsado.
Madumduman nga halin sang Pebrero 19 pa ginapangita ang biktima.
Suno sa magulang sang biktima, naglisensya si Matthew sang Pebrero 17 nga magatambong ini sa welcoming rites sang isa ka fraternity sa Biñan, Laguna.
Pebrero 18 sang aga, nakit-an pa ang biktima kag pila ka mga myembro sang fraternity sa Buendia sa may Pasay City kag pagkagab-i, ginapatihan nga napatay ang biktima.
Base sa pahayag sang saksi, nagdesisyon ang grupo nga i-‘dispose’ ang bangkay sang biktima.
Pagkasunod nga adlaw, Pebrero 19, nakabaton ang magulang sang ‘anonymous message’ angut sa natabo sa iya manghod.
Gilayon nga gin-report ini sang magulang sa kapulisan kag natumod ang 18 ka mga suspek.
Magapangatubang ang mga suspek sang kaso sa paglapas sa Anti-Hazing Law.
