Nagapangabay sang suporta gikan sa mga opisyales sang probinsya ang Philippine Charity Sweepstakes Office (PCSO) agud matapna ang iligal nga operasyon sang Small Town Lottery (STL) sa Negros Occidental.
Sa sulat ni Mr. Jose Manuel Villagracia – Manager sang PCSO Negros Occidental nga gin-address sanday Governor Eugenio Jose Lacson, Vice Governor Jeffrey Ferrer kag kay Mayor Benjie Miranda sa siyudad sang Kabankalan, nagapangayo ini sang suporta gikan sa mga opisyal.
Ginpahibalo man sini ang mga opisyal nga ang naga-isahanon nga otorisado nga operator sang STL sa probinsya amo lamang ang Super Lucky Beagler Inc. (SBLI) kag magluwas diri tanan nga nagapataya kag magapangolekta sang taya kasubong sang “News STL” ang makabig nga iligal.
Ginpahayag pa ni Villagracia nga ang kadalag-an sa operasyon sang STL games, ang makabulig sang dako sa gobyerno nasyunal agud makatipon sang dugang nga pondo para sa charity.
Kasubong man ang pagdugang sang kadamuon sang mga tawo nga makabenepisyo sa mga charity assistance ilabi na ang hospitalization sang mga labing kubos nga pumuluyo.
Nakasaad man sa sulat nga ang PCSO ang nag-isyu sang Small Town Lottery Authorized Agent Corporation (STL-AAC) para sa Negros Occidental kag Bacolod City nga operation sandig sang Board Resolution No. 0205-0 series of 2022.
Madumduman nga nakumpirmar sang National Bureau of Investigation ang operation sang Iligal nga STL sa siyudad sang Kabankalan matapos ang madinalag-on nga entrapment operation sa Barangay 5, Barangay 6 kag Barangay 7 sadtong tinalikdan nga Pebrero 17.*
By Randy Coronel
