Ginkumpirmar ni Army Col. Orlando Edralin, Commander 303rd Infantry Brigade nga may apat ka miyembro sang New People’s Army (NPA) ang napatay kag may isa ka soldado sang 94th IB ang napilasan sa nagluntad nga engkwentro sa Barangay Carabalan, syudad sang Himamaylan takna las 6:20 kaina sang aga, Miyerkules, Marso 1.
Suno kay Edralin, wala pa makilal-an ang mga napatay nga NPA kag wala naman ginhingadlan ang pilason nga soldado bangud wala pa nila natawgan ang pamilya sini.
Nagapanawagan naman si Edralin sa pamilya sang mga napatay nga NPA nga sarang makig-angut sa Philippine Army agud mahibaluan ang mga identity sini.
Samtang ginhatagan naman sang Wounded Personnel Medal ang pilason nga soldado bilang pagkilala sa iya pagkabaganihan.
Dugang pa ni Edralin nga ginapilit sang mga NPA ang mga pumuluyo sang Barangay Carabalan nga maghatag sa ila sang sustento sang pagkaon kag supplies sa kada adlaw rason nga nanugid na ang mga ini sa barangay officials.
May mga narekober nga mga armas-luthang sa ginluntaran sang engkwentro kag padayon nga ginahimo sang mga Army ang ila ikasarang agud ma-amligan ang seguridad sang mga pumuluyo batuk sa mga NPA.
Ginpaathag naman ni Edralin nga ang nagalapta nga fake news angut sa engkwentro sang tinalikdan nga adlaw ang propaganda lamang sang mga NPA agud i-divert ang atensyon sang mga pumuluyo kag gub-on ang reputasyon sang Army.
Ginapanugyan ni Edralin sa mga media nga antes sila magpaguwa sang bisan ano nga litrato ukon data, ikonsulta ini anay sa ila agud malikawan ang pagpalapta sang indi insakto nga balita.*
