Dakup ang isa ka Chinese national kag lima ka iban pa sa ginpatigayon nga separado nga operasyon sa Pangasinan kag La Union kung diin kapin P2.72 Bilyones nga balor sang ginasuspetsuhan shabu ang narekober, suno sa Philippine Drug Enforcement Agency.
Arestado sa operasyon sa Pozorrubio, Pangasinan amo ang Chinese national nga si Ke Wujia ukon kilala bilang James Dagale Galopo, 49-anyos kag tatlo ka mga Pinoy nga sanday Johnbert Yagong, 22-anyos; Jenson Rey Yago, 29-anyos kag Ritchell Repuesto, 28-anyos.
Si Yago ang residente sang Barangay Codcod sa San Carlos City, samtang si Repuesto ang halin man sa syudad sang San Carlos
Kapin 360 ka kilo sang ‘shabu’ nga nagabalor P2.448 Bilyones, buy-bust money, IDs kag pila pa ka paraphernalia ang nakumpiskar halin kay Ke kag sa iya mga kaupdanan.
Sa ginpatigayon nga follow-up operation sa San Fernando, La Union, nakakuha naman ang utoridad sang kapin 40 ka kilos sang ginasuspetsuhan shabu nga nagabalor P272 Milyones, mga cellphones, IDs kag financial documents.
Nadakup man sa La Union nga operasyon si Romel Leyese, 38-anyos kag si John Paul Repuesto, 18-anyos, nga residente man sang San Carlos.
Naka-pack kag may label nga “Chinese Tea” ang mga iligal nga droga nga nakumpiskar.
Ginahanda na karon ang kaso sa paglapas sang Republic Act 9165 ukon Comprehensive Dangerous Drugs Act of 2002 batuk sa mga na-aresto.*
