PASAY – Gin dakop ang isa ka Chinese National matapos ini gina-alegar gin-abduct kag ginhimo sex-slave ang duha ka foreigner nga babayi sa syudad sang Pasay sang Martes, Agosto 23.
Na-rescue sang Pasay City Police ang duha ka biktima nga Cambodian kag Vietnamese national.
Sandig sa inisyal nga imbestigasyon, nag-apply ang mga biktima bilang POGO (Philippine Offshore Gaming Operator) workers apang scam lamang ini sang mga suspetsado agud may ma biktima sila sa Pilipinas.
Nadakpan ang isa sa mga suspetsado nga Chinese national apang nakapalagyo naman ang iban pa.
Nakumpiskar sa suspek ang pila ka sachets ukon pakete sang ginpasuspetsahan shabu kag isa ka 9mm nga pusil.
Ginpanginwala naman sang suspek ang mga nakumpiskar nga iligal nga droga, armas-luthang, pag-abduct kag paghimulos sa mga biktima.
Kun mapamatud-an ang mga akusasyon, magapangatubang ang suspek sa kaso nga abduction, rape, illegal possession of firearms kag paglapas sa Republic Act 9165 ukon Dangerous Drugs Act of 2002.
Padayon naman nga ginapangita sang mga kapulisan ang iban pa nga mga kaupod sang nadakpan nga suspek.
