BACOLOD CITY – Magahimo sang tikang ang ciudad sang Bacolod para mahatagan sang solusyon ang problema sa basura, ini ang pahayag ni Mayor Albee Benitez sang sya ang ma interview sang Radyo Bandera.
Una na diri, ginlunsyar sang tinalikdan nga adlaw ang “Trash to Cash” nga programa kaupod ang Department of Public Services (DPS) kag Basic Environmental Systems Technology (BEST) Technology kun sa diin ang mga plastics, papel, sal-salon kag lata ang ipakilo sa designated center para makakuha sang Environmental Points (EP) nga pwede pabaylohan sang School Supplies ukon Grocery Items.
Dugang pa ni Mayor Benitez nga magahimo sang produkto ang Ciudad ka Bacolod gamit ang mga nakuha nga basura para maka income ukon madonar sa mga eskwelahan sa Bacolod, parehas sang abono.
Dugang pa sang Alkalde nga pagabakudon ka ciudad ang kampanya sa “No Segregation No Collection” para mangin mahapos ang pag-identify sang mapuslan kag indi na mapuslan.
Sa subong, ginatun-an sang ciudad ang mangin sistema kag gina propose ni Mayor Benitez nga igabutang sa Barangay Felisa ang Recycling Facility.*
