BACOLOD CITY– Posible nga mag-resume ang voter’s registration para sa Barangay kag SK Elections matapos nga na-postponed ang natalana nga schedule sang election sa Disyembre 5, 2022.
Sa interview sang Radyo Bandera kay Atty. Ma. Kathrina Caña, Commission on Elections (COMELEC) Bacolod Election Officer, ginpahayag niya nga nakapaguwa sang statement si COMELEC Chairman George Garcia nga posible sa ulihi nga semana sang Nobyembre ukon sa una nga semana sang Disyembre magabalik ang voter’s registration kag ginahulat na lamang ang resolusyon sang COMELEC En Bank.
Kun makasugod na ang COMELEC registration, posible nga maglab-ot sa bulan sang Hulyo, 2023 kag tungod malawig ang panahon, magakadto ang COMELEC sa mga layo kag dalagko nga barangay sa Bacolod para sa registration.
Sa karon, base sa pinakaulihi nga datus sang COMELEC Bacolod yara na sa 330,621 ang mga botante sa siudad.*
