Patay ang isa ka 22-anyos nga construction worker matapos ini makabunggo sa ginasundan nga motorsiklo kag nalapakan sang van sa dalan sang Purok Mainuswagon, Brgy. Antipuluan, syudad sang Bago kahapon sang hapon, Martes, Setyembre 19.
Ang biktima ginkilala kay Stephen Soriano y Antonio, soltero, kag taga Purok Mainuswagon, Barangay Alianza, syudad sang Bago.
Nahibaluan nga nakabunggo si Soriano sa iya ginasundan nga motorsiklo nga ginamaneho man lang sang iya paryente nga si Joven Soriano y Torres, isa man ka construction worker kag taga Barangay Ayungon, syudad sang La Carlota.
Bangud sa impact sang pagkabunggo, nagtabog ang biktima sa piyak nga lane kag nalapakan sang van nga ginamaneho ni Alfred Mendoza, manager sang HUALE SHENGSHI Technology Inc. kag residente sang Seaview Subd., Barangay Guinhalaran l, syudad sang Silay.
Sandig sa interview sang Radyo Bandera kay PLTCOL Jay Malong, hepe sang Bago City Police Station, nga papauli na ang biktima sakay sa motorsiklo kag ang iya paryente nga si Joven gikan sa ila gina-obarahan nga construction site sa syudad sang Bacolod.
Hinali nalang nga may nagliko nga traysikol sa lugar sang aksidente rason nga naghingagaw preno si Joven apang na alang-alang naman si Stephen sa pag-preno kabangdanan sang iya pag-aksidente.
Ginhingagaw pa dala si Stephen sa Bago City Hospital apang gindeklarar ini nga dead on arrival.
Nakahunong naman karon sa Bago City Police Station sanday Joven Soriano kag Alfred Mendoza para sa nagakaigo nga disposisyon.
