“I’m not happy”
Ini ang nangin reaksyon ni City Councilor Carl Lopez, Chairman sang Committee on Environment and Ecology Committee on Agriculture and Agrarian Concerns angut sa sitwasyon sang garbage collection kag moonlighting sang pila ka mga garbage collectors sa syudad sang Bacolod.
Suno sa konsehal, kinahanglan sang improvement ang garbage collection sang syudad matapos makit-an sini ang pila ka mga kapaltahan sa bahin sang Integrated Pest Management (IPM).
Nagpahayag si Lopez nga magapasar ini sang resolusyon angut sa problema kag nagpromisa ini sa publiko nga indi sini pag-e-tolerar ang nasambit nga kapaltahan.
Nagapati man ang konsehal nga kinahanglan sa gihapon sang syudad ang kooperasyon sang mga pumuluyo angut sa problema sa basura.
Ginsiguro man ni Lopez nga hatagan sang aksyon sang iya talatapan ang pila ka mga report nahanungod sa pila ka mga reklamo sang mga home owners nga may mga miyembro sang garbage collector ang nagapangayo sang ‘tip’ kabaylo sa pagkolekta sang ila sini basura.
Ginpaathag ni Lopez nga sa karon ginamonitor na sang iya mga staff ang nasambit nga reklamo.
Ginapahibalo man sini nga 6pm tubtob 9pm ang oras sang garbage collection sa syudad.* |via Kabanderang Aileen Pedreso
