Patay ang drayber sang motorsiklo matapos ini ang nag-shoot sa kanal kag nadaganan sang iya motorsiklo sa national highway sang Barangay 5 sa banwa sang Isabela, Negros Occidental, sini nga Domingo, Agosto 28, 2022.
Wala pa makilal-an ang biktima nga gindala sa Leo Funeral Homes. Wala ini sang identification cards.
Takna las 9:30 sini nga aga sang Domingo, Agosto 28, sang nagpabalo ang kapitan sang Barangay 5 sa banwa sang Isabela nga may patay nga tawo nga nakit-an sa sulod sang drainage kag nasampawan sang iya motorsiklo.
Sandig sa imbestigasyon, ang drayber sang itom nga Rusi motorcycle ang nagapadulong sur sang dalan sang nagdiretso ini kag nahulog sa kanal.
Nakaagum sang madamo nga pilas sa agtang kag lawas ang biktima.
Gindala sa Ignacio L. Arroyo Sr. Memorial District Hospital ang biktima apang ini ang gin-deklarar nga dead on arrival.*
