Suno kay Police Captain Judesses Catalago, Public Information Officer sang Negros Occidental Police Provincial Office (NOCPPO), “dismantled” na ang naga-operate nga drug groups sa probinsya sang Negros Occidental apang may “remnants” ukon may nabilin pa sa nasambit nga mga grupo.
Base sa datus sang NOCPPO, kabahin ang Ramos Drug Group, Divinigracia Drug Group, Bacus Drug Group, Burgos Drug Group, Macundato Drug Group, kag Vertusio Drug Group sa mga na-dismantle pinaagi sa Oplan TOKHANG kag iban pa nga anti-illegal drug operations sang kapulisan sa probinsya.
Dugang pa ni PCAPT Catalogo, may yara na sila sang certification nga nagapamatuod nga na-dismantle na, wala na naga-operate ang nasambit nga drug groups, wala na sila naga-“function as a group”, naga-operate na lamang “individually”, kag indi na tanto mabatyagan bangud naubos na sila pangdakop.
Apang indi sa gihapon mag-untat ang kapulisan sa pag-monitor kag pagbantay sa drug personalities agud madakpan ang mga ini kag mapamatukan ang pagbaligya sang iligal nga droga.
Madumduman sang tinalakdan nga tuig 2022 nga nangin No.1 ang NOCPPO bangud nangin madinalg-on ang ila mga operasyon batuk sa iligal nga droga nga nalakipan sang 707 ka operations kun diin nakadakop sila sang 874 ka mga persona kag nakakumpiskar sang masobra 15,000 ka gramos snag shabu nga nagabalor sang P107,968,214, kag 8,569 ka gramos sang Marijuana nga nagabalor sang P1,028,217.
Ginpasalig pa ni PCAPT Catalogo nga mas ma-“improve” pa sila sini nga tuig 2023 kag mangin madinalag-on sa mga kaso nga ila pagakuhaon.
