Ginamanduan ni Presidente Ferdinand ‘Marcos’ Jr. ang Department of Agriculture nga hibaluon ang rason kun ngaa nagataas ang presyo sang itlog.
Ang direktiba ang ginhatag sang Presidente kay DA Undersecretary Domingo Panganiban sa ginpatawag nga pagsinapol sa Malakanyang sang Martes, Enero 24.
Luyag ni Marcos nga makigsapol si Panganiban sa mga producer kag negosyante sang itlog agud hibaluon kun ngaa nagataas ang presyo sang mga itlog sang manok sa nagligad nga semana apisar nga bastante man ang suplay sini sa merkado.
Sandig sa price watch sang DA sadtong Enero 13, ang mga medium-sized nga itlog ang nagabili sang P9 kada bilog, kumparar sa P6.90 nga presyo sadtong Disyembre 2022.
Ginpahayag sang DA nga ang mga itlog ang dapat yara lamang sa P7 tubtob P7.50 kada bilog bangud sa presyo sini sa farm gate.*
