Sa exclusive interview sang Radyo Bandera News Team, ginkumpirmar ni Roland Andutan, tag-iya kag general manager sang Sanca Security nga duha ang igo sa tutunlan ni Provincial Consultant Marton Cui nga gintunaan sang iya kamatayon.
Pahayag ni Andutan, posible nga ulo kuntani ang target kay Cui apang bangud sa kalayuon sang gunman, naigo ang biktima sa iya nga tutunlan.
Suno kay Andutan, may kalayuon nga 30-50 meters ang gunman sa biktima.
Nahibaloan man nga antes ang nagluntad nga krimen, may persona nga nagbali sang sanga sang kahoy nga nahamtang sa crime scene.
“Kung lantawon mo didto sa lugar sang gunman, obstruction sa sight (sang gunman ang sanga sang kahoy),” suno kay Andutan.
Dugang pa ni Andutan, alas-4 pa lang sang hapon, yara na sa crime scene ang Starex nga van nga gina-alegar ginsakyan sang gunman.
Nagbutang pa diri sang early warning device kag malawig nga nagpark sa lugar sang pagpangluthang.
Sa karon, wala pa sang slug kag mga empty shells nga nakit-an sa crime scene.
