ACCRA, GHANA – Narecord sang Ghana ang duha ka kaso sang makamamatay nga Marburg virus.
Pinakauna ini nga sakit kaangay sa Ebola nga natukiban sa pungsod sang West African, suno sa health authorities sadtong Domingo, Hulyo 17, 2022.
Nanligad nga bulan, ginkuhaan sang blood sample and duha ka indibidwal nga gin-alegar may Marburg virus sa southern Ashanti region.
Ginpadala ang sample sa Pasteur Institute sa Senegal kun sa diin ginkumpirmar ini nga positibo sa Marburg virus, suno sa Ghana Health Service (GHS).
Wala sang bulong ukon bakuna para sa Marburg nga makamamatay man kapareho sang Ebola virus.
Ang sintomas sang nasambit nga virus amo ang mataas nga hilanat, internal kag external bleeding.
Ginpaidalum naman sa quarantine ang 98 ka mga indibidwal nga nahibaluan nga may close contact sa mga nagpositibo, kag wala pa sang bag-o nga narecord nga kumpirmado nga kaso sang Marburg virus sa Ghana, magluwas sa duha.
