BACOLOD CITY – Naigo sang bala sang pusil ang natuo nga paa sang menor de edad samtang nakaangkon naman sang madamo nga kapilasan bangud sa pagdumog kag pagpangkastigo ang 22-anyos nga lalaki sa Handy KTV Bar sa Barangay Salvacion, banwa sang Murcia, Negros Occidental, kaina las 12:25 sang kaagahon, Miyerkules, Disyembre 14.
Sandig sa imbestigasyon, naga-inom-inom ang mga biktima kag mga suspek sang nagluntad ang paglinalisay, suno sa spot report nga ginpadala sa Negros Occidental Police Provincial Office.
Nag-gabot sang wala pa mahibaluan nga armas luthang ang isa sa mga suspek kag gintiro ang menor de edad, samtang ginkastigo naman ang 22-anyos nga biktima nga ginkilala kay Erwin Maguad.
Nalagyo ang mga suspetsado sakay sang traysikol.
Gindala naman sa Murcia Health Unit ang mga biktima apang ginsaylo man sa ospital sa syudad sang Bacolod.
Wala naman may narekober nga empty shell sa crime scene.*
Note: Hungod nga wala ginhingadlan ang isa ka biktima bangud ini isa ka menor de edad.