BACOLOD CITY – Pilason ang empleyado sang Malunggay Pandesal matapos mabungguan sang awto ang iya ginamaneho nga motorsiklo sa city road sa atubangan sang Country Homes, Barangay Dos Hermanas sa syudad sang Talisay, Negros Occidental, takna las 5:00 kaina sang kaagahon, Miyerkules, Disyembre 14, 2022.
Ginkilala ang biktima kay Salvador Catamura, 27-anyos, residente sang Barangay Giang sa Masbate City apang temporaryo nga nagapuyo sa Menlo Heights, Zone 10 sa Talisay.
Sandig sa imbestigasyon, nagasakay sa Yamaha YTX nga motorsiklo si Catamura sang ini ang nabungguan sang Mitsubishi Lancer nga awto nga ginamaneho ni Kolby Lacson, 23-anyos, residente sang Brgy. Dos Hermanas.
Padulong sa nakatungdan nga direksyon ang motorsiklo sang nabungguan sang awto nga nagabiyahe naman pa nasidlangan nga bahin sang dalan.
Matapos sang pagbungguanay, nagdiretso ang motorsiklo sa poste sang kuryente.
Na-obserbaran nga yara sa impluwensya sang makahulubog nga ilimnon ang drayber sang awto. May narekober man nga mga wala unod nga botelya sang beer sa salakyan sini, suno sa report sang kapulisan.
Gindala sa Corazon Locsin Montelibano Memorial Regional Hospital si Catamura samtang gindangat naman si Lacson sa Riverside Medical Center.*